نشرت إلتراس بلاك أرمي المساندة لفريق الجيش الملكي توشيحا حول الأحداث التي شهدتها مباراة الجيش الملكي وفيوتشر المصري برسم الجولة الثالثة من دور مجموعات كأس الكونفيدرلية الإفريقية لكرة القدم.
وفيما يلي نص التوضيح:
من نهار تأسست المجموعة سنة ٢٠٠٦ ، كان و باقي ديما الهدف الأول و الوحيد ديالها هو التواجد وراء الفريق و الدعم ليه مهما كانت النتائج و فأي بلاصة و تحت أي ظرف و الوقوف ضد أي شخص أو جهة كتقيس صورة النادي و المسار ديالو.
للعودة لأحداث مباراة البارح ، تعمّدنا أننا نخرجو ببلاغ بلغة مفهومة للي يشوفها و يفهمها أي واحد كيهموا الأمر.
أول حاجة قبل الخوض فأي شيء ، مجموعة الجيش الأسود ٢٠٠٦ تتقدم اعتذارها لكافة الجماهير العسكرية بيما فيها العائلات للي كانت حاضرة فسهرة كروية افتقدناها لسنوات ، و الاعتذار خاصة لرفقاء الدرب و الإخوة أولتراس عسكري الرباط للي مكانت عندهم حتى علاقة بهاد الأحداث المؤسفة ، أحداث للي مكتمثلناش أولا كعساكر و ثانيا كمجموعة، و كيف عودات المجموعة أعضائها و جميع المتعاطفين معاها على الوضوح التام ، وتحمل المسؤولية فأي مرحلة كيفما كانت التبعيات ديالها ، مهما أن المشكل ماصدرش من المجموعة بالظبط و لكن من باب محسوب علينا ولازم نحميوه ، فالمشكل الجوهر ديالو هو أشخاص مدسوسة وسط الجمهور العسكري ماعندها حتا علاقة بالجيش الملكي أو المجموعة كتستغل الملعب لإخراج عقدها النفسية و كل الأفعال الإجرامية [ السرقة ، استعراض العضلات ، التخريب ..]
من بعد كل هدشي ، كتأكد المجموعة على نقط من الواجب الوقوف عليها :
* الضرب بيد من حديد أي شخص كان متورط فديك الأحداث من الجهات المعنية [ مع أخد بعين الاعتبار الأعضاء للي كتسهر على التنظيم و كانت وسط الأعمال الهمجية كتحاول تدافع على صورة المدرج و ميكونوش أكباش فداء فطريق مجرمين مدسوسين وسط الجمهور.
* عملية الولوج للجمهور و التفتيش [ دخول الأسلحة البيضاء - الغازات المسيلة للدموع - أدوات حادة و ممنوعة.
أخيرا، كنستنكروا هاد الأحداث و كنستنكروا أيضا التفاعل بعض الناس فمهاجمة المجموعتين ، الاصلاح و التوعية والتأطير تاتجي بالتلاحم دجميع أطياف الجمهور و ماشي رمي المسؤولية على الآخر فالاحدات اللي كتوقع.
